電子書列表
電子書
答完「廣東話係唔係你母語？」呢條問題後，再問問自己，你對廣東話認識有幾多有幾深？廣東話俗語你識幾多個？究竟點解要話「有嘢留番拜山先講」？你知道唔同廣東話諺語同歇後語背後嘅含意，定其實係人講你又講？「單眼佬睇老婆」即係乜？「神仙放屁」又點解？你又有冇聽過「大笨象，揸支槍，去打仗，打唔贏，返嚟食碗辣椒醬」或者其他慢慢失傳嘅廣東話童謠？你知道C0T係凍檸茶，但其他茶餐廳術語，髮型屋術語同的士術語你又知幾多？
2021新修版除咗個別章節都有補增內容外，更新增〈香港名人金句〉章節，原來當年蔡楓華講嘅並唔係「一剎那光輝」？李麗珊奪得香港第一金時又點解會講「香港運動員唔係垃圾」呢？新修版新增章節會講講呢啲金句。
- 作者廣東話資料館
- 出版社亮光文化有限公司
- 出版日期2021
「畀、俾、比」三個字有咩分別？「嗰、個、果」究竟要用邊個？「唔使」、「唔駛」定「唔洗」？「辦、辮、辨、辯、瓣」不分？個炒飯究竟係「揚州炒飯」還是「楊洲炒飯」？「liu1 lang1」正確寫法點樣寫？「執書／執輸」、「撕紙／獅子」讀音一樣但意思大不同。
錯別字，係錯字同別字嘅統稱，喺文字發明之後就已經存在，並唔係最近嘅事。所謂錯字，即係寫錯字，通常都係涉及多寫或者少寫咗啲筆劃；而別字又稱為白字，字就冇寫錯到，但係就用錯咗另外一個字。就以中文字而言，指喺文字嘅筆劃、字體或者文法上，形音相似出現訛誤，而構成一啲唔合現時「白話文」書寫規範嘅字都稱為錯別字。但係由於文字嘅發展，好多原本嘅錯字都被扶為正字，而正字反被當成錯字，所以喺現時錯別字嘅判斷，通常就以政府公佈嘅文字為基準。
廣東話資料館「通學」系列第6本《趣看生活——廣東話常見錯別字》，繼續同讀者發掘更多有關香港嘅生活用語。
- 作者廣東話資料館
- 出版社亮光文化出版社
- 出版日期
「通學」系列第8本，講嘅係「香港製造」，詳列唔同範疇嘅香港製造品牌同埋產品，包括土產玩具、汽水品牌、食物品牌、唐餅品牌、西餅品牌、醬料品牌、釀酒工業、製藥品牌、化妝品牌、土產漫畫及製造工業產品。
大家知唔知玩具業曾經係香港傳統重點工業，除咗好多人都玩過嘅公仔紙、換衫紙公仔、鐵皮玩具、西瓜波等等，仲會出口唔少知名玩具。汽水當年又叫做「荷蘭水」，香港喺七〇年代已經有人開廠製造，不過究竟有冇汽水係由荷蘭嚟嘅呢？
香港食品製造業係重要嘅行業，喺一八七〇年代政府已經記錄本地製造業嘅生產活動，王老吉、許留山、十字牌牛奶、甄沾記，未食過都可能聽過吧。唐餅、西餅品牌你又講得出幾多個呢？又有冇人知道香港釀酒業已經有好耐歷史；而五〇年代後期就係香港醬油釀造嘅全盛時期，大部分嘅醬油廠都設喺九龍城寨附近？有關製藥業方面，香港中藥好早以前已經有「丸、散、膏、丹」唔同嘅藥物製劑；而香港西藥嘅發展，最早嘅記載大約喺一八七九年外科醫生報告所提到過。
香港嘅化妝品製造喺二〇世紀初已經開始，不過產業嘅規模唔大，部分公司生產嘅品牌屬於中價產品；喺一九五〇年代以後，香港嘅化妝品市場逐漸被「來路」嘅化妝品佔據。唔睇唔知原來香港漫畫喺清末期間已有記載，歷史夠晒悠久！
- 作者廣東話資料館
- 出版社亮光文化出版社
- 出版日期2021